“Kiberxavfsizlik va etika”: zamonaviy tahdidlarga qarshi bilim va mas’uliyat uyg‘unligi

Raqamli texnologiyalar vazirligida o‘tkazilgan navbatdagi muhim tadbir soha vakillari, xalqaro ekspertlar va yosh mutaxassislarni bir maydonda jamladi. Unda O‘zbekiston Respublikasi Raqamli texnologiyalar vaziri Sherzod Shermatov, vazirlik mas’ullari, AQShning Shimoliy Jorjiya universiteti vakillari, mutaxassislar hamda talabalar ishtirok etdi. Bu kabi keng qamrovli ishtirok tadbirning nafaqat ilmiy, balki strategik ahamiyatini ham yaqqol namoyon etdi.

Tadbir avvalida so‘zga chiqqan vazir bugungi globallashuv va raqamlashtirish jarayonlari sharoitida kiberxavfsizlik tobora ustuvor yo‘nalishga aylanib borayotganini alohida ta’kidladi. Uning qayd etishicha, sun’iy intellekt va ilg‘or texnologiyalar keng joriy etilayotgan bir paytda sohaga faqat texnik yondashuv bilan cheklanib qolish yetarli emas — yuqori darajadagi axloqiy mas’uliyat ham hal qiluvchi omillardan biri hisoblanadi. Shuningdek, mamlakat rahbari tomonidan ushbu yo‘nalishni izchil rivojlantirish, “Cyber University” salohiyatini mustahkamlash va raqobatbardosh kadrlar tayyorlash bo‘yicha aniq ustuvor vazifalar belgilab berilgani qayd etildi.

Ana shunday dolzarb masalalar muhokamasi fonida tadbir doirasida amerikalik olim, professor Murti Rallapalli muallifligidagi “Kiberxavfsizlik va etika” nomli yangi kitobning taqdimoti bo‘lib o‘tdi. Mazkur nashr zamonaviy kibertahdidlar, ularni bartaraf etish strategiyalari hamda raqamli makondagi axloqiy muammolarni kompleks yoritishi bilan ajralib turadi.

Mutaxassislar fikricha, ushbu kitob nafaqat sohaga ixtisoslashgan mutaxassislar, balki keng kitobxonlar auditoriyasi uchun ham muhim qo‘llanma vazifasini o‘taydi. Chunki unda texnologik rivojlanish bilan bir qatorda inson omili va mas’uliyat masalalari ham chuqur tahlil qilingan.

Tadbir yakunida xalqaro hamkorlikni rivojlantirish yo‘lida muhim hujjat — “Cyber University” hamda AQShning Shimoliy Jorjiya universiteti o‘rtasida anglashuv memorandumi imzolandi. Ushbu kelishuv qo‘shma ilmiy loyihalar, akademik almashinuv dasturlari hamda ilg‘or tajribalarni joriy etish imkonini kengaytiradi.

Umuman olganda, mazkur tadbir va uning doirasida taqdim etilgan kitob O‘zbekistonda kiberxavfsizlik madaniyatini yuksaltirish, zamonaviy bilim va ko‘nikmalarga ega mutaxassislar tayyorlash hamda mamlakatning global raqamli makondagi raqobatbardoshligini oshirish yo‘lidagi muhim qadamlardan biri bo‘ldi.