Universitetimizda O‘zbekiston Respublikasi Madaniyat vaziri maslahatchisi Abduraufbek Nabiev bilan uchrashuv bo‘lib o‘tdi.
Tashrif doirasida tomonlar o‘rtasida yaqinda Madaniyat vazirligi bilan imzolangan memorandum asosida amalga oshirilayotgan hamkorlik masalalari muhokama qilindi. Uchrashuvda ushbu kelishuvda belgilangan ustuvor yo‘nalishlarni hayotga tatbiq etish bo‘yicha fikr almashildi.
Jumladan, kiberxavfsizlik madaniyatini aholi orasida keng targ‘ib qilish, raqamli makonda xavfsizlikni ta’minlashga doir bilimlarni ommalashtirish hamda ushbu yo‘nalishda professional mutaxassislar, talabalar va ustozlar ishtirokida ijtimoiy loyihalarni amalga oshirish masalalari ko‘rib chiqildi.
Shuningdek, kiber makon himoyachilari ishtirokida seriallar suratga olish, turli master-klasslar tashkil etish hamda taniqli shaxslar ishtirokida PR va marketing yo‘nalishida qo‘shma loyihalarni yo‘lga qo‘yish bo‘yicha takliflar muhokama etildi.
Uchrashuv davomida “Meros kodi” nomli istiqbolli qo‘shma loyihani amalga oshirish yuzasidan ham dastlabki kelishuvlar bildirildi. Ushbu loyiha orqali madaniy meros, raqamli xavfsizlik va zamonaviy mediakontentni uyg‘unlashtirgan holda keng qamrovli tashabbusni amalga oshirish rejalashtirilmoqda.
Tomonlar hamkorlikni yanada kengaytirish, memorandum doirasida aniq amaliy loyihalarni jadallashtirish hamda kiberxavfsizlik sohasida jamoatchilik xabardorligini oshirish bo‘yicha kelishib oldilar.
Uchrashuv yakunida ikki tomon ham strategik hamkorlikni izchil davom ettirishga tayyor ekanliklarini ta’kidladilar.
