Raqamli taraqqiyot va sun’iy intellekt asri insoniyat oldiga yangi imkoniyatlar bilan bir qatorda yangi vazifalarni ham qo‘ymoqda. Bugungi kunda dunyo mamlakatlari innovatsion rivojlanish, axborot xavfsizligi va ilg‘or texnologiyalarni joriy etish borasida o‘zaro tajriba almashishga alohida e’tibor qaratmoqda.Shu maqsadda 2026-yil 19-iyun kuni «Cyber University» davlat universitetida «2026 Information Technologies and Artificial Intelligence» xalqaro ilmiy-amaliy konferensiyasi bo‘lib o‘tadi. Mazkur nufuzli anjuman ilm-fan, ta’lim va zamonaviy texnologiyalar sohasida faoliyat yuritayotgan mutaxassislarni bir maydonga jamlaydi.
Konferensiyada vazirliklar va davlat tashkilotlari rahbarlari, mahalliy hamda xorijiy olimlar, soha mutaxassislari va ommaviy axborot vositalari vakillari ishtirok etishi kutilmoqda. Bu esa anjumanning xalqaro ahamiyatini yanada oshirib, ilmiy hamkorlik va tajriba almashish uchun keng imkoniyatlar yaratadi.
Tadbir davomida sun’iy intellekt texnologiyalarining rivojlanish istiqbollari, kiberxavfsizlikni ta’minlashning zamonaviy mexanizmlari, raqamli transformatsiya jarayonlari hamda innovatsion yechimlar yuzasidan dolzarb masalalar muhokama qilinadi. Ishtirokchilar nafaqat ilmiy yutuqlar bilan o‘rtoqlashadi, balki kelajak texnologiyalarining jamiyat taraqqiyotidagi o‘rni haqida ham fikr almashadilar.
Bugun sun’iy intellekt va raqamli texnologiyalar taraqqiyotning asosiy harakatlantiruvchi kuchiga aylanib borayotgan bir paytda, ushbu konferensiya ilm-fan va innovatsiyalar rivojiga xizmat qiluvchi muhim xalqaro muloqot maydoni bo‘lib xizmat qiladi. Anjuman natijalari mamlakatimizda zamonaviy texnologiyalarni rivojlantirish, malakali kadrlar tayyorlash hamda xalqaro hamkorlikni kengaytirishga munosib hissa qo‘shishi shubhasiz.