“Cyber University”da Murti V. Rallapalli — University of North Georgia professori, kiberxavfsizlik bo‘yicha mutaxassis — Fulbright Program doirasida taklif etilgan professor sifatida o‘z faoliyatini boshladi.
2025/2026 o‘quv yilining II semestrida professor talabalar uchun “Fundamentals of Programming” kursini olib bormoqda. Shuningdek, talabalarning kasbiy bilim va amaliy ko‘nikmalarini yanada mustahkamlash maqsadida seminarlar, mahorat darslari hamda ochiq ma’ruzalar tashkil etilishi rejalashtirilgan. Mazkur mashg‘ulotlar kiberxavfsizlik va raqamli texnologiyalar sohasida chuqur nazariy bilim hamda amaliy tajriba shakllantirishga xizmat qiladi.
Professor Murti V. Rallapalli kiberxavfsizlik va kompyuter fanlari yo‘nalishida 25 yildan ortiq professional tajribaga ega bo‘lgan yetuk mutaxassisdir. U tizimli muhandislik (System Engineering) yo‘nalishida falsafa doktori (Ph.D.) ilmiy darajasiga ega, axborot xavfsizligi bo‘yicha xalqaro darajadagi sertifikatlangan mutaxassis (CISSP) hisoblanadi. U AQSh va boshqa davlatlarning oliy ta’lim muassasalarida samarali pedagogik faoliyat yuritgan, shuningdek, Fulbright dasturi loyihalarida faol ishtirok etgan.
Turli yillarda professor IBM hamda Honeywell kompaniyalarida rahbarlik va strategik lavozimlarda faoliyat olib borgan. U kiberxavfsizlik yechimlari, komplayens standartlari, kvant hisoblash texnologiyalari va sun’iy intellekt yo‘nalishlarida innovatsion loyihalarni ishlab chiqishda ishtirok etgan, xalqaro ilmiy-amaliy konferensiyalarda ma’ruzalar bilan qatnashgan.
Professorning tashrifi va dars mashg‘ulotlari boshlanishi munosabati bilan 12-fevral kuni universitetga United States Embassy in Tashkent vakillari tashrif buyurdi. Delegatsiyaga Jamoatchilik diplomatiyasi bo‘yicha mutaxassis Anna Balog boshchilik qildi.
Uchrashuv davomida mehmonlarga universitetning ustuvor yo‘nalishlari, ta’lim strategiyasi va asosiy maqsadlari haqida batafsil ma’lumot taqdim etildi. “Cyber University” amaliyotga yo‘naltirilgan ta’lim modeli asosida mutaxassislar tayyorlashni yo‘lga qo‘ygan bo‘lib, bunda tahliliy fikrlash, kasbiy mas’uliyat hamda kiberxavfsizlik va raqamli texnologiyalar sohasidagi amaliy vazifalarni samarali hal eta olish ko‘nikmalarini shakllantirish ustuvor ahamiyat kasb etadi. Universitet zamonaviy ta’lim standartlari va ilg‘or xalqaro tajribalarni joriy etishni o‘zining strategik vazifasi sifatida belgilagan hamda global akademik makonga integratsiyani ta’lim sifati va bitiruvchilar raqobatbardoshligini oshirishning muhim omili deb biladi.
Muloqot chog‘ida tomonlar kelgusidagi akademik hamkorlik istiqbollari, ta’lim jarayonini takomillashtirish va tajriba almashish masalalarini muhokama qildilar. AQSh oliy ta’lim muassasalari bilan hamkorlikni kengaytirish, qo‘shma loyihalarni amalga oshirish va professional aloqalarni mustahkamlash yuzasidan fikr almashildi. Elchixona vakillari ta’lim sohasidagi tashabbuslarning ahamiyatini e’tirof etib, akademik hamkorlikni yanada rivojlantirishga ko‘maklashishga tayyor ekanliklarini bildirdilar.
“Cyber University” ta’lim jarayonining yuqori sifatini ta’minlash, xalqaro standartlarga mos zamonaviy o‘qitish metodikalarini joriy etish hamda ilg‘or xorijiy tajribani o‘rganishga alohida e’tibor qaratadi. Xalqaro ekspertlar bilan hamkorlikni kengaytirish va akademik aloqalarni mustahkamlash esa kiberxavfsizlik va raqamli texnologiyalar sohasida raqobatbardosh, zamonaviy bilim va ko‘nikmalarga ega kadrlar tayyorlashga xizmat qiladi.